ពិព័រណ៌ Osaka-Kansai ដែលនឹងប្រព្រឹត្តទៅរយៈពេលប្រហែល៦ខែ ចាប់ពីថ្ងៃអាទិត្យ ទី ១៣ ខែមេសា ដល់ថ្ងៃច័ន្ទ ទី ១៣ ខែតុលា ឆ្នាំ ២០២៥ គឺជាការតាំងពិព័រណ៌ អន្តរជាតិខ្នាតធំដែលនឹងប្រព្រឹត្តទៅនៅលើកោះ Yume Shima ដែលជាកោះសិប្បនិម្មិត នៅឈូងសមុទ្រ Osaka ហើយនឹងមានការចូលរួមពីប្រទេស និងតំបន់ចំនួន ១៥៨ ជុំវិញពិភពលោក ក៏ដូចជាអង្គការអន្តរជាតិចំនួន៩ផងដែរ។

ប្រធានបទជាសកលនៃពិព័រណ៌ អន្ដរជាតិលើកនេះគឺ “ការរចនាអនាគតសង្គមសម្រាប់ជីវិតរបស់យើង (Designing Future Society for Our Lives)”។ ប្រធានបទបន្ទាប់បន្សំរួមមាន “ការសង្គ្រោះជីវិត (Saving Lives)”、“ការបង្ហាញសមត្ថភាពជីវិត (Empowering Lives)” និង “ការផ្សារភ្ជាប់ជីវិតរស់នៅ (Connecting Lives)” ជាដើម។ ប្រទេសនីមួយៗបានណែនាំអំពីវប្បធម៌ បច្ចេកវិទ្យា និងគោលនយោបាយរបស់ខ្លួនតាមរយៈស្តង់បង្ហាញផ្ទាល់ខ្លួន ដើម្បីបង្ហាញពីសកម្មភាពសម្រាប់អនាគតរបស់សង្គម។ ក្រៅពីការតាំងពិព័រណ៌ស្តង់បង្ហាញរបស់ប្រទេសនានា នៅក្នុងទីលានក៏មានកម្មវិធីផ្លូវការដែរ នោះគឺ “ថ្ងៃជាតិនៃប្រទេសនីមួយៗ (National Day)” ដែលប្ដូរវេនគ្នាជារៀងរាល់ថ្ងៃ ដោយប្រទេសនីមួយៗបានផ្សព្វផ្សាយអំពីវប្បធម៌ ឧស្សាហកម្ម និងគោលនយោបាយរបស់ខ្លួនជាប្រចាំថ្ងៃ។

ចាប់តាំងពីពេលបើកពិព័រណ៌មកដល់ថ្ងៃទី ៥ ខែកក្កដា ឆ្នាំ ២០២៥ ចំនួនអ្នកចូលរួមសរុបបានឈានដល់ ១០,៨០៩,៤៦៧នាក់ ហើយមានការរំពឹងថាចំនួននោះនឹងបន្តកើនឡើងទៀតនៅពេលវិស្សមកាលនារដូវក្តៅមកដល់ផងដែរ។
ស្តង់ពិព័រណ៌កម្ពុជា

ស្តង់ពិព័រណ៌កម្ពុជាមានទីតាំងនៅក្នុងតំបន់ “Saving Zone” នៅក្នុងកន្លែងតាំងពិព័រណ៌ ដែលផ្អែកលើគោលគំនិតនៃ “Saving Lives” ហើយនឹងបើកជាសាធារណៈចាប់ពីថ្ងៃដំបូងដែលពិព័រណ៌បើកជាសាធារណៈនៅថ្ងៃទី ១៣ ខែមេសា ឆ្នាំ ២០២៥។

ស្តង់ពិព័រណ៌នេះរួមបញ្ចូលគ្នានូវ វប្បធម៌ ធនធានធម្មជាតិ និងឧស្សាហកម្ម ហើយក៏រួមបញ្ចូលនូវទិដ្ឋភាពនៃ “ការពង្រឹងជីវិត” តាមរយៈគំរូដ៏ធំនៃប្រាសាទកោះកេរ កន្លែងផលិតកសិកម្ម សិប្បកម្មរបស់ស្ត្រី និងខ្លឹមសារវីដេអូស្តីពីការគាំទ្រផ្នែកអប់រំ ផ្តោតលើការលើកកម្ពស់ជីវភាពរស់នៅរបស់ប្រជាជនផងដែរ។ ការរៀនអន្តរកម្មត្រូវបានផ្សព្វផ្សាយតាមរយៈការណែនាំជាសំឡេង វីដេអូអន្តរកម្ម ដោយការភ្ជាប់ជាមួយកម្មវិធី AR ។

ព្រឹត្តិការណ៍នេះបានទាក់ទាញការចាប់អារម្មណ៍ពីអ្នកទស្សនាក្នុងថ្ងៃបុណ្យជាតិរបស់ប្រទេសកម្ពុជា ហើយមានភាពអ៊ូអរជាមួយនឹងអ្នកទស្សនាដ៏ច្រើនកុះករបន្ទាប់ពីការធ្វើក្បួនដង្ហែរនេះ។

ទិវាជាតិកម្ពុជា

នៅថ្ងៃទី ៥ ខែ​ កក្កដា ឆ្នាំ ២០២៥ ព្រះរាជាណាចក្រកម្ពុជា បានប្រារព្ធទិវាជាតិរបស់ខ្លួន។
ឯកឧត្តម Hisayuki Fujii អនុរដ្ឋមន្ត្រីក្រសួងការបរទេស ក្នុងនាមជាតំណាងរបស់ប្រទេសជប៉ុន បានឡើងថ្លែងអំពីសារៈសំខាន់នៃការលើកកម្ពស់សហការនាពេលអនាគតតាមរយៈកញ្ចប់សហប្រតិបត្តិការសេដ្ឋកិច្ច និងការផ្លាស់ប្តូរគ្នាតាមរយៈវប្បធម៌។ បន្ទាប់មក ឯកឧត្តម សុខ ចិន្តាសោភា ឧបនាយករដ្ឋមន្ត្រី នៃព្រះរាជាណាចក្រកម្ពុជា ក៏បាន​ធ្វើការថ្លែង​សុន្ទរកថាផងដែរ។ ឯកឧត្តម ឧបនាយករដ្ឋមន្ត្រីក៏បានថ្លែងអំណរគុណចំពោះជំនួយរបស់ប្រទេសជប៉ុន និងទំនាក់ទំនងមិត្តភាពរវាងប្រទេសទាំងពីរ ព្រមទាំងបានពន្យល់អំពីផែនការរបស់លោកក្នុងការលើកកម្ពស់គោលនយោបាយសេដ្ឋកិច្ចដោយផ្អែកលើការរៀបចំរចនាសម្ព័ន្ធឧស្សាហកម្ម និងប្រព័ន្ធពាណិជ្ជកម្មពហុភាគី ដោយអំពាវនាវឱ្យមានការសហការបង្កើតកំណើនប្រកបដោយចីរភាព។

នៅពាក់កណ្តាលចុងក្រោយនៃពិធីនេះ ក៏មានបង្ហាញពីការសម្តែងរបាំអប្សរាផងដែរ ហើយកាយវិការដ៏ទន់ភ្លន់ និងសំលៀកបំពាក់ប្រពៃណីជាតិខ្មែរបានទាក់ទាញចំណាប់អារម្មណ៍ទស្សនិកជនយ៉ាងច្រើនកុះករ។ បន្ទាប់ពីពិធីនេះ ក្បួនដង្ហែរវប្បធម៌មួយត្រូវបានប្រារព្ធឡើងនៅតាមបណ្តោយផ្លូវប្រារពពិធីទៅកាន់ទីកន្លែងស្តង់ពិព័រណ៌របស់កម្ពុជា ដោយមានឧបករណ៍ភ្លេង និងការសម្តែងរបាំអប្សរាអមតាមដងផ្លូវផងដែរ។
បន្ទាប់ពីក្បួនដង្ហែរនោះ ការប្រគុំតន្ត្រីបានចាប់ផ្ដើមលេងម្តងទៀតនៅពីមុខស្តង់ពិព័រណ៌ ហើយគេបានឃើញភ្ញៀវទេសចរណ៍ និងសមាជិកសហគមន៍ខ្មែរនៅប្រទេសជប៉ុនមួយចំនួនបានរាំជារង្វង់ ដែលធ្វើឲ្យមានការទាក់ទាញការចាប់អារម្មណ៍ពីអ្នកទស្សនាផងដែរ។