លោក ខន គង្គា  នាយកប្រតិបត្តិក្រុមហ៊ុន ERA
អាយុ ៣៥ ឆ្នាំ
ទីកន្លែងកំណើត            ខេត្តកណ្តាល
ចំណង់ចំណូលចិត្ត​        ការធ្វើដំណើរកំសាន្ត

 សូមណែនាំអំពីខ្លួនអ្នក និងប្រវត្តិរបស់ក្រុមហ៊ុនរបស់អ្នកបន្តិចផង  

>> ខ្ញុំបាទ​ឈ្មោះ ខន គង្គា អាយុ៣៥ឆ្នាំ ទីកន្លែងកំណើតនៅ ភូមិស្វាយមាស ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។ បច្ចុប្បន្នជាអគ្គនាយកក្រុមហ៊ុន ERA Cambodia ហើយខ្ញុំបានបញ្ចប់បរិញ្ញាប័ត្រផ្នែកគ្រប់គ្រងពាណិជ្ជកម្ម ពីសាកលវិទ្យាល័យមេគង្គកម្ពុជាឆ្នាំ២០១៤។ អំឡុងពេលនោះដែរ ខ្ញុំបានចាប់ផ្តើមអាជីពជាអ្នកអចលនទ្រព្យ ដោយបានចូលក្នុងក្រុមហ៊ុនអន្តរជាតិមួយកាលពីឆ្នាំ២០១៤ រហូតដល់ដើមឆ្នាំ២០១៨។ ដូចគ្នានេះដែរ នៅដើមឆ្នាំ២០១៨ ខ្ញុំបានធ្វើការចរចារយក ប្រេនក្រុមហ៊ុនអចលនទ្រព្យដ៏ល្បីមួយរបស់សហរដ្ឋអាមេរិកគឺប្រេន ERA ដោយពេលនោះ ខ្ញុំបានចរចារជាមួយសិង្ហបុរី និង អាមេរិក ដោយសារតែ ប្រេន ERAមានដើមកំណើតនៅសហរដ្ឋអាមេរិក តែក្នុងតំបន់អាស៊ីគឺគ្រប់គ្រងដោយប្រទេសសិង្ហបុរី។

តើអ្នកបានក្លាយជាផ្នែកមួយនៃ ERA Group ដែលជាក្រុមហ៊ុនល្បីល្បាញក្នុងសាកលលោកដោយរបៀបណា? សូមប្រាប់ពីហេតុផល និងប្រវត្តិបន្តិចផង

>> បាទ ដោយសារក្នុងនាមជាអ្នកអចលនទ្រព្យ ហើយខ្ញុំបានធ្វើការក្នុងក្រុមហ៊ុនអចលនទ្រព្យដែលជាប្រេនអន្តរជាតិមួយដែរ ហើយនៅពេលនោះខ្ញុំបានសិក្សាថាតើនៅក្នុងពិភពលោកមានប្រេនណាខ្លះដែលល្បីៗ ហើយឃើញថា ប្រេន ERA ជាប្រេនមួយដែលល្បីនៅក្នុងពិភពលោកជា Top 3  Top 4 ប៉ុន្តែអ្វីដែលវាល្អលើសប្រេនដទៃទៀតនោះគឺថា នៅក្នុងបណ្តាប្រទេសនៅអាស៊ី គឺវាលេខមួយ។ ERA ប្រេន នៅក្នុងបណ្តាប្រទេសអាស៊ីគឺមានភ្នាក់ងារលក់ជាង ៤០០០០នាក់ ការិយាល័យលក់ជាង២២០០កន្លែង មាននៅក្នុង៣៩ប្រទេស ហើយនៅអាស៊ីមានជាង១០ប្រទេស។ មានប្រេនល្បីៗជាច្រើននៅលើពិភពលោក ប្រេនខ្លះអាចល្បីនៅអ៊ឺរ៉ុប ប្រេនខ្លះអាចល្បីនៅអាមេរិក ហើយនៅអាស៊ីប្រេនដែលល្បីជាងគេគឺប្រេន ERA      អញ្ចឹងការចរចារយកប្រេននេះយកមក ក៏មិនមែនជារឿងងាយស្រួលដែរ មិនមែនថាយើងមានលុយ ហើយអាចចរចារទិញប្រេននេះយកមកបាននោះទេ ដោយគេត្រូវសិក្សាថា យើងមានចំណេះដឹងនិងជំនាញពិតប្រាកដឬអត់? តើយកប្រេនគេមកហ្នឹងអាចធ្វើបានល្អឬអត់?  ខ្ញុំបានចំណាយពេល៩ខែ ២០ថ្ងៃដើម្បីចរចារយកប្រេននេះមកបាន។ ពីមុនខ្ញុំមានបទពិសោធន៍កាន់ខាង Franchise របស់ក្រុមហ៊ុនអន្តរជាតិ អញ្ចឹងហើយខ្ញុំយល់ដឹងរាល់សេចក្តីលម្អិតនៅក្នុង MFA ( Master Franchise Agreement ) ដែលវាអាចធានានូវផលប្រយោជន៍នៅពេលដែលយកប្រេនគេមកក្នុងប្រទេសយើងបាន។

 តើអ្វី​ដែល​ធ្វើ​ឱ្យ​ក្រុមហ៊ុន​របស់​អ្នក​ខុស​ពី​ក្រុមហ៊ុន​អចលនទ្រព្យ​ផ្សេង​ទៀត?

>>ចំណុចស្នូលនៃការរកស៊ីគឺ យើងឈរលើគោលការណ៍នៃភាពស្មោះត្រង់ និង ភាពត្រឹមត្រូវស្របច្បាប់។ រាល់គម្រោង ឬ អចលនទ្រព្យដែល ERA មុននឹងយកមកលក់ គឺត្រូវបានសិក្សាយ៉ាងលម្អិត និងច្បាស់លាស់ មិនមែនមានន័យថា អោយតែអចលនទ្រព្យគឺយើងយកមកលក់នោះទេ ហើយ ERA ឈរលើគោលការណ៍ដែលមិនមែនគិតតែលុយនោះទេ គឺយើងចង់លក់អោយអតិថិជនម្តងហើយម្តងទៀត មានន័យថាបើគាត់ទិញ ហើយលក់ទៅវិញគឺគាត់អាចចំណេញ ហើយបើគាត់ទិញដើម្បីរស់នៅ គឺមានផាសុកភាព ហើយERA គឺយកចិត្តទុកដាក់ មើលថែអតិថិជន រាល់គ្រប់បញ្ហា ក្នុងការពិភាក្សា និង រកដំណោះស្រាយ ក្រោយពេលទិញអចលនទ្រព្យរួច ដូចជាការយឺតយ៉ាវបង់ប្រាក់ ការរត់ប្លង់អចលនទ្រព្យជាដើម។ល។  

តើអ្នកអាចរៀបរាប់ពីវិធីសាស្រ្តរបស់អ្នកក្នុងការកសាង និងរក្សាទំនាក់ទំនងអតិថិជនក្នុងវិស័យអចលនទ្រព្យបានទេ?

>> ខ្ញុំគិតថាចំណុចសំខាន់គឺខ្ញុំចាត់ទុកអតិថិជនដូចជាគ្រួសាររបស់យើង ដូចជាបងប្អូនរបស់យើង អញ្ចឹងនៅពេលដែលយើងចាត់ទុកអតិថិជនជាបងប្អូនរបស់យើងហើយ គឺយើងមិនមានបំណងអាក្រក់ ដើម្បីនាំអតិថិជនទៅទិញអចលនទ្រព្យដែលមិនត្រឹមត្រូវ ដោយគិតតែផលប្រយោជន៍នោះទេ។ អញ្ចឹងហើយធម្មតាបើយើងចាត់ទុកអតិថិជនដូចជាបងប្អូន នោះយើងនឹងណែនាំទៅដល់អតិថិជននូវអ្វីដែលល្អ អ្វីដែលមានសារប្រយោជន៍តែប៉ុណ្ណោះ។ អញ្ចឹងនេះហើយជាចំណុចសំខាន់ ចំពោះអតិថិជនដែលមកវិនិយោគជាមួយ ERA គឺយើងមិនគិតពីប្រាក់ចំណេញដែលមានរយៈពេលខ្លីនោះទេ ព្រោះវាអាចធ្វើអោយខូចទំនាក់ទំនងបាន។

តើអ្នកមានដំបូន្មានអ្វីចំពោះអ្នកទិញផ្ទះលើកដំបូង?

>>តាមពិតទៅ នៅក្នុងប្រទេសអភិវឌ្ឍគឺគេផ្តោតសំខាន់លើការរើសភ្នាក់ងារលក់អចលនទ្រព្យ អញ្ចឹងធម្មតាដែលយើងជាប្រជាជនសាមញ្ញ អ្នកវិនិយោគធម្មតាហើយខ្វះពត៌មាន នោះការសម្រេចចិត្តរបស់យើងគឺនៅមានកម្រិត។​ ចំពោះអតិថិជនវិញគឺប្រសិនបើគាត់មិនធ្លាប់មានបទពិសោធន៍សោះ ចំណុចដំបូងដែលត្រូវធ្វើគឺជ្រើសរើសភ្នាក់ងារ ហើយភ្នាក់ងារនោះគឺត្រូវមានអាជ្ញាប័ណ្ណ មានប៉ាតង់ និងការចុះបញ្ជីត្រឹមត្រូវ ហើយជាពិសេសគឺ​មានប្រេនច្បាស់លាស់។ មកដល់សព្វថ្ងៃនេះ យើងបានចំណាយលុយជិត ៦លានដុល្លារ ទាំងការិយាល័យ អញ្ចឹងមានន័យថា លុយ១ម៉ឺនដុល្លារតើខ្ញុំអាចធ្វើអោយខូចប្រេនរបស់ខ្ញុំបានឬអត់។ គឺមិនអាចដោះដូរបានទេ ទោះបីជា១លានដុល្លារ ក៏មិនអាចដោះដូរបានជាមួយនឹងអ្វីដែលខ្ញុំខំកសាងតាំងពីឆ្នាំ២០១៨មក។ អញ្ចឹងហើយគឺត្រូវជ្រើសរើសភ្នាក់ងារត្រឹមត្រូវដែលជារឿងសំខាន់។ 

តើអតិថិជនរបស់អ្នកភាគច្រើនជាអតិថិជនប្រភេទណាដែរ?

>>យើងចាប់ផ្តើមឡើងតាំងពីឆ្នាំ២០១៨ ហើយយើងមានអតិថិជនជាច្រើន ក្នុងនោះមានដូចជា៖ អតិថិជនកូរ៉េ សាំងហ្គាពួរ ជប៉ុន ឥណ្ឌូនេស៊ី វៀតណាម ថៃ ម៉ាឡេស៊ី  ហើយថ្មីៗនេះមានអតិថិជនមកពីប្រទេស​ប៉ូឡូញ និងសហគមន៍អ៊ឺរ៉ុប ដូចជាប្រទេសបារាំង អង់គ្លេស រូស្ស៊ី និង អាមេរិក ជាដើម។ ERA មានអតិថិជនច្រើន នោះគឺដោយសារតែប្រេន ERA មានរហូតដល់ ៣៩ប្រទេស​ ដែលធ្វើអោយគេស្គាល់ច្រើន ហើយអតិថិជនមកថ្មី ពេលដែលឃើញប្រេន ERA គឺពួកគេមានទំនុកចិត្តចង់ទិញ ឬជួលអចលនទ្រព្យជាមួយ ERA។ យើងចាប់ផ្តើមតាំងពីការជួលខុនដូ រហូតដល់ជួល Apartment រហូតដល់ឥលូវគឺយើងបានពង្រីកសេវាកម្ម ការធ្វើបុរីតែម្តង។

អ្នកប្រើប្រាស់ភាពខ្លាំងទាំងនោះដោយរបៀបណា?

>> ចំនុចខ្លាំងដែលយើងធ្វើមកដល់ពេលនេះ គឺយើងផ្តោតទៅលើការបណ្តុះបណ្តាលដល់ភ្នាក់ងារលក់របស់យើងអោយមានជំនាញ មានវិជ្ជាជីវៈ ហើយជាពិសេសនោះគឺ integrity សេចក្តីសុចរិត  អញ្ចឹងហើយភ្នាក់ងាររបស់យើងដែលទទួលបានជោគជ័យគឺយើងបញ្ជូនអោយទៅរៀននៅប្រទេសផ្សេងៗ ដែលជាពិសេសនោះគឺប្រទេសសាំងហ្គាពួរដែលជាប្រទេសដៃគូរបស់យើង។ យើងមើលឃើញថា បច្ចុប្បន្នសាំងហ្គាពួរមានភ្នាក់ងារលក់១ម៉ឺននាក់ ដែល Commission ប្រចាំឆ្នាំពី ៦០០ ទៅ ៧០០លានដុល្លារ ហើយអញ្ចឹងវាជាឳកាសសម្រាប់បង្ហាញទៅដល់ភ្នាក់ងាររបស់កម្ពុជាយើងថា នៅលើពិភពលោកជាពិសេស សាំងហ្គាពួរគេមានភ្នាក់ងារអាចសម្រេចទៅដល់កម្រិតហ្នឹង ភ្នាក់ងារខ្លះគាត់អាចរកចំណូលរហូតដល់១០លានដុល្លារក្នុងមួយឆ្នាំ។ អញ្ចឹងហើយ យើងបានបង្វឹកបុគ្គលិកភ្នាក់ងារនៅក្នុងស្រុកខ្មែរ ហើយ​បញ្ជូនទៅសិក្សានៅប្រទេសដៃគូបន្ថែមដើម្បីសិក្សា ដោះដូរបទពិសោធន៍និងរៀនសូត្រពីគេវិញ។ ធម្មតាគេដើរមុនយើង គេដល់ចំណុចមួយ ដែលយើងត្រូវរៀនសូត្រពីគេ នេះហើយគឺជាការប្រើនូវចំណុចខ្លាំងរបស់យើង។     

តើអ្នកវាស់ស្ទង់ភាពជោគជ័យរបស់អ្នកជាភ្នាក់ងារអចលនទ្រព្យដោយរបៀបណា?

>> ខ្ញុំគិតថាភាពជោគជ័យគឺជារឿងមួយដែលពិបាកវាស់។ តើយើងយកហិរញ្ញវត្ថុទៅវាស់? យើងយកពេលវេលាទៅវាស់ ឬក៏យើងយកលុយឬទ្រព្យសម្បត្តិទៅវាស់?​ ក៏ប៉ុន្តែសម្រាប់ខ្ញុំ ភាពជោគជ័យមួយដែលអាចវាស់បាននោះគឺទាក់ទងនឹង Good Impacts ការជះឥទ្ធិពលល្អ វិជ្ជមានទៅដល់សង្គម ដោយបង្កើនស្តង់ដារនៃការធ្វើអាជីវកម្មអចលនទ្រព្យអោយទៅដល់កម្រិតមួយដែលពិភពលោកគេទទួលស្គាល់ និងអោយអតិថិជនមិនថាក្នុងស្រុក ឬ បរទេសអោយគេស្គាល់ ពេញចិត្តនិងស្រលាញ់សេវាកម្មរបស់យើង នេះគឺជាចំណុចសំខាន់ ហើយត្រូវប្រឹងប្រែងនិងអភិវឌ្ឍបន្តទៅមុខទៀត ដែលជាចំណុចពិសេសក្នុងការចូលរួមចំណែកដ៏សំខាន់ក្នុងការអភិវឌ្ឍន៍ទៅដល់សង្គមជាតិយើង។ ​   

ខ្ញុំបានលឺថាអ្នកប្រើបច្ចេកវិទ្យាឌីជីថលយ៉ាងសកម្ម ប៉ុន្តែតើអ្នកប្រើវាដោយរបៀបណា?

>> តាមពិតទៅ ប្រេនERA បានចាប់ផ្តើមតាំងពីឆ្នាំ១៩៧០ជាង ERAគឺមានន័យថា​ Electronic Realty Associates អញ្ចឹងជាក្រុមហ៊ុនមួយដែលប្រើ ​Fax machine ដើម្បីផ្តល់ព័ត៌មានទៅដល់អតិថិជនរហូតមកដល់ពេលនេះយើងUpdate  យើងបានអភិវឌ្ឍបច្ចេកទេសដល់កម្រិតមួយកាន់តែទំនើបជាងមុន យើងមាន App Boost Database Boost សម្រាប់ភ្នាក់ងារបុគ្គលិក​ដើម្បីគ្រប់គ្រងព័ត៌មានទាំងអស់នៅក្នុងក្រុមហ៊ុន ហើយយើងអាចបញ្ជូនព័ត៌មានបានយ៉ាងលឿនទៅកាន់អតិថិជន ហើយក្រៅពីនេះក៏យើងបានប្រើប្រាស់នូវបណ្តាញសង្គមផ្សេងទៀតដូចជា៖ Facebook​ Telegram Whatsapp Tik Tok  Wechat រួមទាំងwebsite ដើម្បីបញ្ជូនព័ត៌មានពីគម្រោងអចលនទ្រព្យរបស់យើង ទៅកាន់អតិថិជនទាំងអស់នៅជុំវិញពិភពលោក។

អ្នកមានភ្នាក់ងារច្រើន ប៉ុន្តែតើអ្នកអប់រំ និងគ្រប់គ្រងពួកគេដោយរបៀបណា?

>>ធម្មតាក្រុមហ៊ុនដែលមានស្តង់ដារគឺគេមានប្រព័ន្ធគ្រប់គ្រងរបស់គេ ការបែងចែកភាគលាភក៏ច្បាស់លាស់  ការបែងចែកកម្រៃជើងសារក៏ច្បាស់លាស់ ហើយអ្វីដែលយើងធ្វើគឺគោរពទៅលើគោលការណ៍នៃក្រុមហ៊ុនរបស់យើង យើងមិនមែនដើម្បីតែបានលុយ​ គឺធ្វើអោយខុសគោលការណ៍ ខុសសីលធម៌ ខុសវិជ្ជាជីវៈរបស់យើងទេ ហើយភ្នាក់ងាររបស់យើងមុននឹងសម្រេចចិត្តគឺត្រូវមើលលម្អិតលើកុងត្រារបស់យើងថាអាចទទួលយកបានដែរឬអត់ ព្រោះធម្មតាយើងក៏ចង់បានភ្នាក់ងារមកដែលមានគុណសម្បត្តិ  ថាតើគាត់អាចសមស្រប និង គោរពទៅតាមការណែនាំរបស់យើងដែរអត់។​ ឧទាហរណ៍ថា ភ្នាក់ងារ ERA មិនអាចធ្វើគម្រោងមួយដែលខុសពី ERA យកទេ អញ្ចឹងបើគាត់ហ៊ានទៅធ្វើ មានន័យថាគាត់បានបំពានកិច្ចសន្យា បំពានការណែនាំ។ ហេតុអ្វីបានជាគម្រោងខ្លះ ERA មិនយក  មិនមែនមានន័យថាអោយតែលក់បានលុយគឺយកនោះទេ ក៏ប៉ុន្តែគឺមកពីគម្រោងខ្លះអត់មានអាជ្ញាប័ណ្ណ គម្រោងខ្លះអត់អាចកាត់ប្លង់រឹងបាន គម្រោងខ្លះមានបញ្ហាទំនាស់ប្តឹងផ្តល់ជាដើម។ ជាទូទៅ គ្រប់ភ្នាក់ងារ ERA ដែលចូលមកទាំងអស់ មុនដំបូងគឺត្រូវទទួលការសម្ភាសន៍ជាមុនសិន បន្ទាប់មកទៀតគឺត្រូវចូលវគ្គចាប់ផ្តើម Orientation និងចុងក្រោយគឺការចុះកុងត្រា។ នៅក្នុងវគ្គចាប់ផ្តើម Orientation គឺយើងពន្យល់អំពី System ក្រុមហ៊ុន  អញ្ចឹងទាំងការផ្សព្វផ្សាយ ការស្លៀកពាក់ និងការប្រាស្រ័យទាក់ទង ការបែងចែកភាគលាភ គឺលម្អិតក្នុងពេលចាប់ផ្តើម នេះ បន្ទាប់ពីហ្នឹងមក បានយើងចូលទៅដល់ការពន្យល់នូវផលិតផលអចលនទ្រព្យ អោយយល់ដឹងអំពីគម្រោងមួយច្បាស់លាស់ មុននឹងយើងបញ្ជូនព័ត៌មានដល់អតិថិជន។ ភាគច្រើនដែលយើងឃើញសព្វថ្ងៃ គឺមានការផ្សព្វផ្សាយអចលនទ្រព្យដែលមិនត្រឹមត្រូវ គឺធ្វើអោយមានការចាប់អារម្មណ៍ខ្លាំងពេក តែមិនមែនជាការពិត ហ្នឹងគឺជាចំណុចមួយដែលមានហានិភ័យមែនទែន។

តើអ្នកអាចចែករំលែកពួកយើងបានទេ ថាតើគោលបំណងអ្វីខ្លះដែលធ្វើឲ្យអ្នកទៅប្រទេសជប៉ុនដើម្បីចូលរួមវេទិកាធុរកិច្ច?

>> តាមពិតគឺយើងទៅអមដំណើរសម្តេចបវរធិបតី ហើយនៅក្នុងនោះយើងបានជួបជាមួយនឹងក្រុមហ៊ុនធំៗ តាមរយៈ JETRO  ហើយឆ្លៀតឳកាសហ្នឹងយើងក៏បានជួបជាមួយបងប្អូនដែលកំពុងរស់នៅនិងធ្វើការនៅប្រទេសជប៉ុនផងដែរ គោលដៅសំខាន់នៃការទៅនេះគឺដើម្បីទាក់ទាញអ្នកវិនិយោគពីប្រទេស      ជប៉ុនមកថែមទៀត  ដោយសារបច្ចុប្បន្ននេះ មានជនជាតិជប៉ុនដែលកំពុងតែរស់នៅក្នុងប្រទេសកម្ពុជាជាង៤០០០នាក់ ហើយមានជាង៤០០ក្រុមហ៊ុនកំពុងរកស៊ីក្នុងប្រទេសយើង។ ខ្ញុំបានចំណាយពេល៩ថ្ងៃ ដើរលេងកំសាន្តនៅកន្លែងមួយចំនួននៅប្រទេសជប៉ុនដូចជា ភ្នំហ្វូជី ទីក្រុងយូកូហាម៉ា ក្យូតូ កាវ៉ាសាគី និង តូក្យូ ឃើញថាទឹកដីប្រទេសជប៉ុនធំ ប្រជាជនមានចំណូលខ្ពស់ ហើយបើនិយាយពីកម្ចីធនាគារវិញគឺការប្រាក់ទាបត្រឹមតែ ០.៨% តែប៉ុណ្ណោះ  អញ្ចឹងហើយប្រសិនបើជនជាតិជប៉ុនចង់វិនិយោគនៅបណ្តាប្រទេសនៅក្នុងតំបន់អាស៊ីគឺកម្ពុជាដូចជាកូនក្រមុំអញ្ចឹងដែលស្ថិតនៅទីតាំងយុទ្ធសាស្រ្តដ៏សំខាន់ កម្លាំងពលកម្មគឺនៅល្អ ប្រជាពលរដ្ឋខ្មែរអាចនិយាយភាសាបរទេសបានដូចជាភាសាជប៉ុន ភាសាអង់គ្លេស ភាសាចិនជាដើម ហើយប្រជាជនខ្មែរខិតខំប្រឹងប្រែងធ្វើការងារ។ នេះហើយជាកត្តាដែលអាចទាក់ទាញអ្នកវិនិយោគមកវិនិយោគនៅប្រទេសខ្មែរបាន។ ភាគច្រើនជប៉ុនដែលមករកស៊ីនៅខ្មែរគឺជោគជ័យ គ្រាន់តែត្រូវការពេលវេលាបន្តិច។ អញ្ចឹងហើយដើម្បីទាក់ទាញគេអោយមកបាន​  ដំបូងគឺត្រូវផ្សព្វផ្សាយអោយគេស្រលាញ់ពេញចិត្ត និងការផ្តល់ទំនុកចិត្ត  អោយគេវិញ។

ក្នុង​នាម​ជា​អ្នក​ដឹក​នាំ​មិន​ត្រឹម​តែ​ក្នុង​វិស័យ​អចលន​ទ្រព្យ​ទេ តើ​អ្នក​ប្រើ​យុទ្ធសាស្ត្រ​អ្វី​ដើម្បី​គ្រប់​គ្រង​បុគ្គលិក​ឲ្យ​មាន​ប្រសិទ្ធភាព?

>> ខ្ញុំគិតថា ពួកគាត់គួរប្រឹងប្រែងអភិវឌ្ឍលើចំណេះដឹង និង ជំនាញរបស់ពួកគាត់បន្ថែម។ ឧទាហរណ៍ថា បើយើងរកស៊ីទៅលើវិស័យអចលនទ្រព្យគឺយើងត្រូវធ្វើអោយច្បាស់លើវិស័យអចលនទ្រព្យ បើយើងរកស៊ីខាងផ្នែកអាហារដ្ឋាន ត្រូវអោយប្រាកដខាងផ្នែកហ្នឹង។ ចំណុចដែលប្រឈមនៅក្នុងក្រុមហ៊ុនគឺការគ្រប់គ្រងបុគ្គលិកនេះហើយ អញ្ចឹងគឺត្រូវតែមានប្រព័ន្ធគ្រប់គ្រងបុគ្គលិក ទាំងផ្នែកហិរញ្ញវត្ថុ ផ្នែកទីផ្សារ ផ្នែកលក់ គឺត្រូវមាន SOP ( Standard Operation Procedure )   ហើយត្រូវធ្វើទៅតាម Guideline  ដូចជា គោរពតាមពេលម៉ោងចេញ ម៉ោងចូល អ្វីដែលគួរធ្វើ អ្វីដែលមិនគួរធ្វើ។ ហើយប្រសិនបើយើងមានច្បាប់ក្នុងក្រុមហ៊ុនចែងច្បាស់លាស់ នោះនឹងងាយស្រួលគ្រប់គ្រង ផ្ទុយទៅវិញប្រសិនបើក្រុមហ៊ុនមួយដែលគ្មានច្បាប់ច្បាស់លាស់ មិនមានការណែនាំ និងអត់មានប្រព័ន្ធត្រឹមត្រូវទេ នោះប្រាកដណាស់នឹងមានបញ្ហាដែលពិបាកក្នុងការគ្រប់គ្រង។

ក្នុងអំឡុងពេលកូវីត វិស័យអចលនទ្រព្យកម្ពុជា បានជួបប្រទះនូវបញ្ហាមួយចំនួន។ តើក្រុមហ៊ុនរបស់អ្នក បានជួបប្រទះដូចក្រុមហ៊ុនអចលនទ្រព្យដទៃដែរឬទេ? ប្រសិនបើជួប តើបានដោះស្រាយបញ្ហាដោយរបៀបណាដែរ?

>>​ ពិតជាសំណួ​រល្អមែន។ ខ្ញុំអាចនិយាយបានថាតាំងពីខ្ញុំចាប់ផ្តើមមក មកដល់ឥលូវគឺ ក្រុមហ៊ុន​ ERA មិនទាន់បានស្រួលមួយថ្ងៃទេ។ ឆ្នាំ២០១៨ គឺយើងបោះឆ្នោតជាតិ ជាធម្មតានៅពេលបោះឆ្នោតគឺការទិញលក់អចលនទ្រព្យមានការថយចុះ ហើយក្រុមហ៊ុនយើងបើកចំឆ្នាំហ្នឹងតែម្តង។ លុះដល់ឆ្នាំ២០១៩ គឺជាឆ្នាំល្អមែនទែន ហើយជាពិសេសវិស័យអចលនទ្រព្យគឺដំណើរការល្អ ដល់ចុងឆ្នាំ២០១៩ ខ្ញុំបានទៅប្រទេសចិន ហើយខ្ញុំបានដឹងពីបញ្ហាកូវីតនេះ ដោយឃើញពេលជិះយន្តហោះ គឺមានបាញ់ថ្នាំស្រ្ពេអាល់កុល និង ពាក់ម៉ាស់។ ក្រោយមកនៅដើមឆ្នាំ២០២០ កម្ពុជាផ្ទុះកូវីត ហើយការទិញលក់កាន់តែថមថយខ្លាំងមែនទែន ហើយបើសិនជានិយាយពីការទិញលក់ពីបរទេសមកវិញគឺសឹងតែគ្មាន។ បញ្ហានេះបន្តរហូតដល់២០២១ ហើយឆ្នាំ ២០២២ ចាប់ផ្តើមសង្រ្គាមរវាងអ៊ុយក្រែន និងរូស្ស៊ី ឆ្នាំ២០២៤ សង្រ្គាមរវាងអ៊ីស្រាអែល និង ប៉ាឡេស្ទីន ហើយឆ្នាំ២០២៥នេះទៀតគឺសង្រ្គាមពាណិជ្ជកម្មពិភពលោក ជាពិសេសរវាងអាមេរិក និងចិន។ អញ្ចឹងការរកស៊ីនេះមិនងាយស្រួលទេ ក៏ប៉ុន្តែប្រសិនបើយើងគិតបែប Local, think Locally យើងប្រាកដជាស្លាប់ និង ដួលរលំ។ ពេលនោះក្នុងឆ្នាំ ២០២៤ ខ្ញុំបានធ្វើដំណើរទៅក្រៅជាង១០ប្រទេស ដូចជានៅ បជ្ឈឹមប្រទេស និង ឌូបៃជាដើម ហើយខ្ញុំមើលឃើញថាស្ថានភាពសេដ្ឋកិច្ច និងការទិញលក់អចលនទ្រព្យរបស់ពួកគេគឺនៅមានដំណើរការល្អ និងមានសន្ទុះខ្លាំងដដែល។ ថៃ សាំងហ្គាពួរ វៀតណាម គេក៏មានបញ្ហា ហើយបើមើលទៅ ឡាវ ភូមាវិញ​គឺរឹតតែកម្សត់ទៅទៀត ដល់ពេលមកកម្ពុជាវិញឃើញថាកម្ពុជានៅមានឳកាសច្រើន អញ្ចឹងខ្ញុំបានធ្វើការជាមួយនឹងភ្នាក់ងារបរទេសច្រើនមាន ហុងកុង អាមេរិក ជប៉ុន ដើម្បីធ្វើការទាក់ទងអំពីឳកាសនៃអចលនទ្រព្យនៅកម្ពុជា។ តាមពិតទៅ នៅក្នុងអាជីពជាអ្នកអចលនទ្រព្យ ពេលណាក៏អាចលក់បានដែរ ពោលគឺពេលចុះក៏អាចលក់បាន ពេលឡើងក៏អាចលក់បាន ប៉ុន្តែប្រភេទនៃអ្នកទិញគឺផ្សេងគ្នា។ ពេលវេលាឥលូវគេហៅថា Buyer market ទីផ្សាររបស់អ្នកទិញ អ្នកទិញគឺមានអំណាចក្នុងការចរចារ តែកាលចុងឆ្នាំ២០១៩គឺ Seller Market អំណាចនៃអ្នកលក់ ព្រោះមនុស្សដណ្តើមគ្នាទិញ អញ្ចឹងហើយអោយតែយើងដឹងអំពីរបត់ថាយើងគួរតែចាប់យកនៅក្នុងទីផ្សារណាមួយ ពេលហ្នឹងគឺយើងមានឳកាស ហើយជាពិសេសយើងធ្វើការជាមួយនឹងអ្នកវិនិយោគពីបរទេស ដូច្នេះហើយយើងមានផ្លូវរស់ និងបន្តទៅមុខបានអំឡុងពេលពិបាកដោយសារយើងមានយុទ្ធសាស្រ្ត។

តើអ្នកគិតថាអ្វីដែលជារឿងសំខាន់សម្រាប់ចែករំលែក ឬដំបូន្មានចំពោះក្មេងៗជំនាន់ក្រោយដែលចង់សាកល្បងលើមុខជំនួញ ដើម្បីបានទទួលភាពជោគជ័យ? 

>> ខ្ញុំគិតថាអ្វីដែលសំខាន់គឺការកសាងមូលដ្ឋានគ្រឹះ។ ពេលខ្លះមនុស្សគិតថាចង់បានលុយច្រើនពេក អ្វីក៏គាត់ហ៊ានធ្វើដែរ ក៏ប៉ុន្តែវាមិនមាន​រយៈពេលយូរនោះទេ។ គាត់អាចបានលុយរយៈពេលខ្លី គាត់នឹងបាត់លុយទៅវិញ ហើយគាត់នឹងអស់ឳកាសទៅរកលុយវិញ ក៏ប៉ុន្តែប្រសិនបើយើងកសាងគ្រឹះអោយបានរឹងមាំនោះនឹងមិនងាយរលំឡើយ។ ហើយគ្រឹះរឹងមាំបូកជាមួយនឹង កេរ្តិ៍ឈ្មោះយើងល្អ នោះការរកស៊ីយើង ទោះបីជាវាយឺតក៏ដោយ ក៏ប៉ុន្តែវាបូក និងឡើងរហូត។ សំណួរសួរថា៖តើគួរកសាងមូលដ្ឋានគ្រឹះនៅកន្លែងណា? គឺរកក្រុមហ៊ុនដែលមានស្តង់ដារមកកសាង ព្រោះយើងមិនអាចទៅកសាងដោយខ្លួនឯង​ និងមិនដឹងពីរបៀបដែលត្រូវកសាងនោះទេ។ ឧបមាថា៖ប្រសិនបើយើងមិនដែលឡើងភ្នំអេវើរ៉េស ហើយចង់ឡើងដោយមិនដឹងពីសមត្ថភាពនិងផ្លូវឡើង នោះគឺមិនអាចទេ។ តែបើយើងចង់ឡើងភ្នំអេវើរ៉េស ហើយយើងដើរតាមអ្នកដែលធ្លាប់ឡើងដល់ភ្នំអេវើរ៉េសរាប់សិបដង នោះយើងនឹងអាចទៅរួច។ ដូចគ្នាដែរ ក្នុងវិស័យអចលនទ្រព្យ ​ERA បានដំណើរការជាង៥០ឆ្នាំមកហើយ បើនិយាយពីបទពិសោធន៍ តាំងពីសង្រ្គាមស៊ីវិល សង្រ្គាមពិភពលោក បញ្ហាសេដ្ឋកិច្ចគឺឆ្លងកាត់រាប់មិនអស់ ហើយនៅតែអាចឆ្លងបាន។ តែប្រសិនបើយើងគ្មានជំនាញ គ្មានបទពិសោធន៍ ហើយយើងខ្វះការណែនាំទៅទៀត​ សួរថាយើងអាចឆ្លងផុតដែរឬទេ? ប្រាកដណាស់ ដែលវាពិបាកនឹងឆ្លងផុត អញ្ចឹងហើយ ការកសាងមូលដ្ឋានគ្រឹះ កសាងកេរ្តិ៍ឈ្មោះអោយល្អ ហើយបើចំពោះយុវជនគឺត្រូវប្រឹងប្រែងរៀនសូត្រ ក្រេបយកចំណេះដឹង និង ប្រឹងប្រែងបញ្ចេញសមត្ថភាពនៅកន្លែងធ្វើការ ធ្វើការអោយបានល្អបំផុតបើទោះបីជាធ្វើការអោយគេក៏ដោយ។ ធ្វើការជាបុគ្គលិក តែសូមគិតអោយដូចជាថៅកែ ប្រសិនបើធ្វើការជាបុគ្គលិកហើយគិតដូចជាបុគ្គលិកនោះនឹងមិនងាយរីកចម្រើនទេ។ ខ្ញុំធ្លាប់ចូលបម្រើការងារអោយគេ នៅក្នុងក្រុមហ៊ុនអចលនទ្រព្យដំបូង ហើយខ្ញុំសុំគេធ្វើការចំនួន៣ដង បានគេអោយធ្វើការ  ដែលពេលនោះគឺទទួលបានប្រាក់ខែ៣០០ដុល្លារក្នុង១ខែ។ ហើយខ្ញុំធ្វើការគឺឡើងប្រាក់ខែរហូត ក៏ប៉ុន្តែពេលធ្វើការគឺខ្ញុំមានគោលដៅរបស់ខ្ញុំដែលមិនមែនទៅដើម្បីយកប្រាក់ខែ៣០០ដុល្លារនោះទេ គឺទៅដើម្បីរៀនសូត្រ និងកសាងមូលដ្ឋានគ្រឹះ ហើយក៏មិនមែនមានបំណងប្រកួតប្រជែងជាមួយថៅកែរបស់ខ្ញុំទេ។ ប្រសិនបើមានបំណងប្រកួតជាមួយថៅកែ ម៉្លេះមកដល់ពេលនេះខ្ញុំនឹងបរាជ័យហើយ ព្រោះធម្មតាគាត់មានចំណេះ គាត់មានធនធាន គាត់មានអំណាច ដូច្នេះខ្ញុំគិតធ្វើយ៉ាងម៉េចអោយត្រូវប្រឹងប្រែងរៀនសូត្រ ធ្វើការងារអោយល្អ មានសមត្ថភាព គឺមានឳកាសហើយ នេះហើយជាចំណុចសំខាន់។ សមត្ថភាពមនុស្សគឺមិនចេះអស់នោះទេ បើកាន់តែប្រឹងប្រែងគឺសមត្ថភាពនឹងកាន់តែកើនឡើង។